ఆరో వరల్డ్ కప్.. 16వ గోల్.. చరిత్ర సృష్టించిన లియోనెల్ మెస్సీ

ఫిఫా వరల్డ్ కప్ 2026లో డిఫెండింగ్ ఛాంపియన్ అర్జెంటీనా తన టైటిల్ వేటను ఘనంగా ప్రారంభించింది. కెప్టెన్ లియోనెల్ మెస్సీ తన కెరీర్‌లో చిరస్మరణీయ ప్రదర్శనతో చెలరేగగా, ఇవాళ జరిగిన గ్రూప్ 'జె' ఆరంభ మ్యాచ్‌లో అల్జీరియాపై 3-0 తేడాతో అర్జెంటీనా భారీ విజయాన్ని నమోదు చేసింది. ఈ మ్యాచ్‌లో మెస్సీ వరల్డ్ కప్ చరిత్రలోనే తన తొలి హ్యాట్రిక్‌ను నమోదు చేసి, జట్టుకు తిరుగులేని విజయాన్ని అందించాడు. ఈ ప్రదర్శనతో ఫుట్‌బాల్ ప్రపంచంలో పలు అరుదైన రికార్డులను తన ఖాతాలో వేసుకున్నాడు.

ఆట ఆరంభం నుంచే అర్జెంటీనా పూర్తి ఆధిపత్యం ప్రదర్శించింది. మ్యాచ్ 17వ నిమిషంలో రోడ్రిగో డి పాల్ అందించిన అద్భుతమైన పాస్‌ను మెస్సీ గోల్‌గా మలిచి జట్టుకు ఆధిక్యాన్ని అందించాడు. ఈ గోల్ చేసిన అనంతరం 38 ఏళ్ల మెస్సీ భావోద్వేగంతో కన్నీళ్లు పెట్టుకోవడం అభిమానులను కదిలించింది. ఆ తర్వాత తనదైన శైలిలో డ్రిబ్లింగ్ నైపుణ్యంతో అల్జీరియా డిఫెన్స్‌ను ఛేదిస్తూ 60వ నిమిషంలో రెండో గోల్ సాధించాడు. ఆట 76వ నిమిషంలో నికో గొంజాలెజ్ అందించిన అసిస్ట్‌తో మూడో గోల్ చేసి తన హ్యాట్రిక్‌ను పూర్తి చేశాడు. మ్యాచ్ ఆరంభంలో అల్జీరియా ఒక గోల్ చేసినప్పటికీ, అది ఆఫ్ సైడ్‌గా తేలడంతో అర్జెంటీనాకు ఊరట లభించింది.

చరిత్ర సృష్టించిన మెస్సీ
ఈ మ్యాచ్‌తో మెస్సీ ఫుట్‌బాల్ చరిత్రలో సరికొత్త అధ్యాయాన్ని లిఖించాడు. ఆరు వరల్డ్ కప్ టోర్నమెంట్‌లలో పాల్గొన్న తొలి ఆటగాడిగా రికార్డు సృష్టించాడు. ఈ హ్యాట్రిక్‌తో వరల్డ్ కప్‌లలో అతని మొత్తం గోల్స్ సంఖ్య 16కు చేరింది. దీంతో జర్మనీ దిగ్గజం మిరోస్లావ్ క్లోజ్ పేరిట ఉన్న ఆల్-టైమ్ అత్యధిక గోల్స్ రికార్డును సమం చేశాడు. అంతేగాక‌ వరల్డ్ కప్ చరిత్రలో బ్రేస్ (రెండు గోల్స్) సాధించిన అత్యంత పెద్ద వయస్కుడైన ఆటగాడిగా కూడా నిలిచాడు.

స్వల్ప గాయం ఆందోళనలు ఉన్నప్పటికీ మెస్సీని తుది జట్టులో ఆడించినట్లు కోచ్ లియోనెల్ స్కలోని తెలిపారు. హ్యాట్రిక్ సాధించిన తర్వాత అతడిని సబ్స్టిట్యూట్ చేయగా, స్టేడియంలోని ప్రేక్షకులందరూ నిలబడి చప్పట్లతో అభినందనలు తెలిపారు. 2022 వరల్డ్ కప్ ఆరంభ మ్యాచ్‌లో ఎదురైన ఓటమి షాక్ పునరావృతం కాకుండా అర్జెంటీనా జాగ్రత్తపడింది. మిడ్‌ఫీల్డ్‌లో ఎంజో ఫెర్నాండెజ్, అలెక్సిస్ మాక్ అలిస్టర్ అద్భుతంగా రాణించి ఆటను పూర్తిగా తమ నియంత్రణలో ఉంచుకున్నారు. 2014 తర్వాత తొలిసారి వరల్డ్ కప్‌కు అర్హత సాధించిన అల్జీరియా గట్టి పోటీ ఇచ్చే ప్రయత్నం చేసినా, మెస్సీ మ్యాజిక్ ముందు తేలిపోయింది. ఈ విజయంతో ఆస్ట్రియా, జోర్డాన్ ఉన్న గ్రూప్‌లో అర్జెంటీనా టైటిల్ ఫేవరెట్‌గా తన ప్రయాణాన్ని ప్రారంభించింది.